LINGAWLINGAW SA TING-INIT 2011

Ang “Lingawlingaw Sa Ting-init 2011” usa ka programa sa lokal nga pangagamhanan sa Balamban nga pinanguluhan nila ni Mayor Ace Stefan V. Binghay ug ni Vice-Mayor Rosario Veloso – Binghay.  Kini nagtumong alang sa pagbansay sa mga batan-on sa natad sa paugnat sa kusog ug sa natad sa sining sa panahon sa ting-init. Gitinguha pud niini nga mahatagan ug laing lingawlingaw ang mga kabatan-onan aron mahilikay sa bisyo. Kini namugna gumikan sa pakig-alayon sa goberno ug sa DepEd-Balamban.

Adunay duha ka hugna ang maong programa – ang summer camp ug ang summer festival.

Nahitabo ang summer camp niadtong Abril 14-16 & 18-20, 2011 sa nagkadaiyang venue sa lungsod sa Balamban. Apan ang summer camp sa natad sa teatro ug painting, ubos sa hangyo sa mga ginikanan ug sa pagtugot ug pagsuporta sa mayor, gipatas-an hangtod niadtong Mayo 13, 2011. Ang mga lalik sa mga batan-on nga nag-edad gikan sa 5 hangtod 18 años sa natad sa painting gipasundayag hangtod sa pagtagik ning maong lindog sa usa ka painting exhibit nga gipahigayon sa municipio. Samtang ang sa natad sa teatro nagpasundayag sa ilang katakos sa pag-arte ug usa ka hamubong musical drama excerpt sa “100 Days to Heaven” sa ABS-CBN atol sa DepEd Nite sa Barangay Baliwagan niadtong gabii sa Mayo 12, 2011 sa Baliwagan Covered Court. 

     

Sa laing bahin, ang summer festival gisugdan niadtong Abril 30, 2011 pinaagi sa usa ka fun run nga gipahigayon sa alas 5:30 sa buntag hadiin ang starting ug finish line niini gihimo atubangan gayud sa E.S. Binghay Memorial Cultural & Sports Complex. Gisalmotan kini sa bisan kinsang baskog ug panglawas ug hunahuna nga gustong moapil; sa mga tinun-an ug mga magtutudlo; sa mga kawani sa goberno; sa mga membro sa Sangguniang Bayan sama nila ni Hon. Avelino Pilapil, Hon. Eliezer Climaco, ug Hon. Norberto Bardenas; ug sa batan-on ug abtik nga amahan sa lungsod nga si Mayor Ace Stefan V. Binghay. Homan sa maong fun run, formal nga gibuksan sa alas 8:00 sa buntag ni Hon. Alex S. Binghay, nga kanhi amahan sa lungsod ug karon kasamtangan nga membro sa Junta Provincial sa Sugbu, nga nagsaulog sa iyang adlaw nga natawhan sa susamang adlaw, ang “Lingawlingaw Sa Ting-init 2011” didto sa E.S. Binghay Memorial Sports Oval. Didto usab sa maong pagbukas ang laing membro sa Junta Provincial sa Sugbu sa tercero distrito nga si Hon. Cesar Ian Zambo ug ang iyang kapikas; ang ubang membro sa Sangguniang Bayan sama nila ni Hon. John Ismael “Jimbo” Borgonia, Hon. Norberto Bardenas, Hon. Gemma Monong, Hon. Gretel Borgonia, ug uban pa; ang tanang membro sa Sangguniang Kabataan Federation nga pinanguluhan ni Hon. Cristy Michaela Diola; ug ang mga administrador sa pampublikong tunghaan sa Balamban.

Ang natad sa paugnat sa kusog nabahin sa duha ka categoria – ang school category ug ang SK category. Ang school category nga nabahin sa division sa elementaria ug secondaria gisugdan dayon pagkahapon sa samang adlaw ug gitapos niadtong Mayo 2, 2011. Gilangkuban kini sa tanang duwa apil na ang “duwa sa kaliwatan”. Samtang ang SK category nga gilangkuban lamang sa duwa nga basketball ug volleyball gipahigayon niadtong Mayo 2, 2011 ug natapos niadtong Mayo 27, 2011.

Kasagaran ang mga duwa sa natad sa paugnat sa kusog gihimo sa adlawan gawas sa basketball nga mohangtod sa kagabhi-on. Sa laing bahin usab, ang indigay sa natad sa pagsayaw ug pag-awit gihimo ra sa usa ka gabii niadtong Mayo 2, 2011 didto sa E.S. Binghay Memorial Cultural & Sports Complex. Gipahigayon kini sa mga magtutudlo nga na-assign sa sining (sama nila ni Rosendo Laya, Juniel Gomez, Junrey dela Cerna, Hannizah Concepcion Olvidado, Jose Gary Napoles, Twyla Lurica, Ryan Baterna, Ma. Gala Marcellones – Enerio, ug sa tagsulat ning maong lindog ug uban pa) inubanan sa mga kawani sa opisina sa Human Resource Development (HRD) sa LGU-Balamban (sama nila ni Lavinia Narsico, Mai, Ian Aranduque, Rosemarie Guirnaldo, ug uban pa). Lakip sa mga categoria sa indigay sa natad sa sayaw ang hip hop, pair dance, Latin dance sport, ug ang folk dance. Sa indigay sa pag-awit ang nakadaug sa secondaria gikan sa Buanoy National High School – Main Campus nga si Jessie Joy Bandiala ug sa elementaria gikan sa Balamban Central Elementary School.

Ang mga resulta sa nagkalainlaing indigay sa duwa sa pag-ugnat sa kusog mahimong mahibaw-an sa MPDO sa municipio ug mahimong duolon ang andam ug abtik kanunay nga si Joel Yray.

Ang labing gitan-aw nga mga duwa sa paugnat sa kusog mao ang volleyball ug basketball sa SK category. Apan mas daghan ang naikag sa pagtan-aw sa volleyball kay kini gipahigayon man atbang gayud sa bag-o nga municipio ug bantang kaayo sa mga manan-away. Makalingaw gayud nga tan-awon ang maong duwa ilabi na ang sa boys division kay gawas nga lig-on kaayo ang mga team nga nangapil higpit kaayo ang ilang panagsangka. Ug mas nahugyaw pa kini kay apil man sa team sa Abucayan ang bayot nga si Kuting Gadia nga dili lang maayong molayat kondili maayo pa gayud nga mosawom. Apan kon makalingaw ang boys division, makainit pud sa ulo ang dugay nga pagsugod sa final elimination games sa girls division gumikan sa technical nga lalis kabahin sa ground rules sa pagpili kon kinsa ang moduwa sa kampeonato. Nahimo kining lalis kay wala maklaro kon unsa ang angay nga sundon – ang point system ba o ang standing sa duwa. Nasabutan sa mitambong sa panagsabot nga gipahigayon sa MPDO nga “back to zero” ang score sa Magic Four (kini mao ang Cantuod, Cambuhawe, Abucayan, ug Buanoy) ug round robin ang sistema sa duwa nga sundon. Ang team sa Cambuhawe nga nataligam-an sa pagpatawag sa maong panagsabot, wala makasabot sa pamaagi ug decision. Tungod sa pagtuo nga naarkansi sila ug natikasan sa atubangan, mibiya sila ug wala na miduwa. Busa gideklarar na lang sila nga automatic nga mabutang sa ika-upat nga dapit sa mga mananaug base sa balaud sa forfeiture. Apan bisan pa niini, padayon nga miduwa ang mga teams sa Buanoy, Abucayan, ug Cantuod. Dili lang matago sa panagway sa mga atleta ang kasagmuyo ug ang kawalay gana. Init na pud kaayo ang mga ulo sa mga officiating officials ilabi na katong adunay mga gidapigan nga team. Niining maong sitwasyon, kadaghanan sa mga kawani sa municipio nga nanan-aw nakaingon nga katong mga kawani sa municipio ug sa mga tunghaan nga adunay gidapigan ug ilabi na katong mibarog isip mga coaches dili na lang unta mag-apil-apil sa pag-opisyo sa duwa ug dili na lang mag-coordinator sa sunod aron walay samok. Kay dason pa nila, mahimo lang kining bati nga sumbanan sa mga batan-on nga gustong magtinarong sa duwa ug mao usab unya kiniy mahimong babag aron molambo ang Balamban sa maong natad sa paugnat sa kusog.

Nindot usab kaayong tan-awon ang basketball. Apan mas hinam nga tan-awon ang basketball sa SK category nga nabahin sa duha ka division – ang “mountainous barangay” division ug ang “along-the-road” division. Daghan ang lig-on nga manuwaay sa mga team sa Magsaysay, Cabagdalan, Hingatmonan, Arpili, Cambuhawe, KKB, ug uban pa. Apan isip team, aduna gayuy motumaw nga mananaug gumikan sa panaghiusa sa lihok, kusog, ug hunahuna. Sa  “mountainous barangay”  division mitumaw nga mananaug ang SK Ginatilan Basketball Team sa unang dapit, ang SK Cabagdalan Basketball Team ang sa ikaduhang dapit, ug ang SK Singsing Basketball Team ang sa ikatulong dapit. Sa “along-the-road” division mas lig-on ang SK Baliwagan nga wala gayuy pildi-pildi gikan sa sugud sa mga duwa. Gumikan niini ang SK Baliwagan Basketball Team ang migawas nga mananaug sa unang dapit sa maong division. Gisundan kini sa SK Arpili Basketball Team nga maoy nakigsangka sa nahisgutan sa championship game niadtong gabii sa May 27, 2011 sa E.S. Binghay Memorial Cultural & Sports Complex. Samtang nahamutang sa ikatulong dapit sa mga mananaug ang SK Nangka Basketball Team. Gikan  sa maong mga mananaug mipili ang municipio ug mga atleta nga milangkub sa Balamban Basketball Team alang sa umaabot nga PJG (Pablo John Garcia) Basketball Cup.

Sa kinatibuk-an nagmalampuson ang “Lingawlingaw Sa Ting-init 2011”. Dili lang tungod sa pagtambayayong sa DepEd-Balamban, Balamban SKF, ug sa LGU-Balamban kondili tungod usab sa pagbulig sa Kahitas-an. Kay matod pa ni Mayor Ace Stefan V. Binghay sa iyang opening remarks sa pagbukas gayud sa maong summer festival, “… Sakto gyud ang title sa atong kalihukan karon, ‘Lingawlingaw Sa Ting-init’… Abi naku’g di mating-init kay kauwanon ganiha…” Ug matod pa niya una pa lamang kini. Nagpasabot nga aduna pay mosunod. Sakripisyo’g gamay alang sa mga nag-opisyo kay naibanan man ang ilang pagbakasyon. Apan sakripisyo nga adunay kahulugan sa pag-umol sa mga kabatan-onan. Busa, magkita na pud ta hangtod sa sunod nga “Lingawlingaw Sa Ting-init”.